Келшымаш
+3 °С
Облачно
Все новости
Тӱрлӧ
10 Сентябрьыште , 11:15

Колледжыште у тунемме ий тўҥалын

1 сентябрьыште Мишкан агропромышленный колледжыште шинчымаш кече эртен

Тиде пайрем школышто тунемше-влаклан веле огыл, студент-влакланат шерге да чоным вургыжтарыше улеш.
У тунемме ийыште Мишкан агропромышленный колледж 150 студентлан икымше гана омсажым почын. Нунылан, теҥгечсе тунемше-влаклан, колледжыште чылажат у, но нуно ончыкылык профессийыштым чын ойырен налмылан да шкеныштын ончыкылыкыштлан ўшанат. Колледжыште ончыкылык повар, строитель, механизатор, мўкш ончышо, тракторист, бухгалтер-влак тунемыт.
Торжественный линейкыште студент ден туныктышо-влаклан салам шомакым колледж директор В. Байбулатов ойлен:
- Шерге ўдыр-рвезе-влак! Студент илыш илышыште эн оҥай, волгыдо да йомартле жап. Ты жапыште те ятыр уым пален налыда, у йолташ-влакым муыда, шонымашдам шукташ тўҥалыда. Тек тендан тунемме жапда эре волгыдо лиеш, занятий-влак оҥайын эртат, а экзаменым чыланат сайын сдатледа. Чылаландат алал кумыл ден чолгалыкым тыланем. Пайрем дене! У тунемме ийыште у сеҥымашыш шуза!
Саламлымашке тыгак Мишкан район МР администраций вуйлатыше П. Трапезников, район администрацийысе ял озанлык отдел начальник Д. Усманов, Мишкан сельсовет СП вуйлатыше Р. Ишмакаев, педагогический пашан ветеранже С. Андерзянов ушненыт. Нуно чыланат студент-влаклан тазалыкым, пиалым да сай тунеммашым тыланеныт.
Торжественный линейкыште Россий ВорлдСкилс IX чемпионатыште «Мўкшым ончымаш» классыште сеҥыше В. Муртазиным саламлыме. П. Трапезников тудлан Чап грамотым кучыктен да эшеат кугурак сеҥымашыш шуаш тыланен. Тылеч вара колледж директор тауштыме серыш дене лектышым погымаште ойыртемалтше рвезе-влакым палемден: Д. Васиьевым, И. Петровым, В. Изибаевым, И. Гарелкиным, С. Чистяковым, Д. Ямаевым. Пайрем мучаште ўдыр-рвезе-влаклан икымше оҥгыр йўк йоҥгалтын. Тыге у тунемме ий тўҥалын.
Студент-влаклан чылаштланат пеҥгыде тазалыкым, чолгалыкым, ытымашым да творческий шўлышым тыланена! Сайын тунемза!
М. ГАЙСИНА, колледжын методистше.

Автор:Фирдаус Кадикова