Все новости
Тӱрлӧ
12 Ӱярня , 12:12

Салтак деч куанле увер

Кульчубай ялыште илыше Шайхитдиновмыт ешлан у ий куанле увер гыч тўҥалын

Салтак деч куанле увер
Икана нунын омсаштым почтальон пералтен да кугу конвертым кучыктен. Серыш тыглай серыш дечын палын ойыртемалтын. Алексей эргышт служитлыме воинский частьын штампшым ужмеке, ача-ава єрыныт... «Мо лийын?» - вуйыштышт лач тыгай шоныш пӧртын. Но, конвертым почмеке, ӧрмашым куан вашталтен – тиде командований дечын тауштыме серыш улмаш.
Сурт виклан кутко шуэшке савырнен: ава куанен шорташ тўҥалын, ача тўрлӧ поро шомакым ойлен, родо-шочшыштат куанышт дене пӧлалтыныт. Поро увер ял мучко писын шарлен. Ача-ава дене пырля Алексей верч пошкудыжо, йолташыже да тыглай палымыже-влакат куаненыт.
А 51460 войсковой частьын командирже Подполковник А. Омурбеков возымо письмаште тыге возалтын улмаш: «Войсковой частьын командованийже тыланда алал кумылын увертара: тендан эргыда воинский долгшым кўлеш семын шукта. Шочмо элна верч сайын служитлаш ача-аван сугыньжым ок мондо, Российын государственный интересше верч тыршен служитла.
Тыршымыжлан кӧра боевой подготовкышто кўкшӧ показательыш шуын, тунеммаште ончыл верыште улеш. Ме частьын личный составше дене пырля тудын сеҥымашыж дене кугешнена да тыланда, тыгай сай эргым ончен-куштымыланда, чон гыч лекше тау мутым ойлена. Те шочмо элнам аралаш ямде улшо, ўшанле салтакым куштенда».
Алексей шуко икшыван Зинаида да Сергей Шайхитдиновмыт ешыште шочын-кушкын. Ешыште тудын Маша акаж ден Олег изаже улыт. Алексей лач Олег дечын примерым налын кушкын да тудын дене эре кугешнен. Чорай ялысе марий гимназийыште 9 классым пытарымеке, рвезе Пўрє оласе профессиональный колледжыш тунемаш пурен, тушто сварщик профессийым налын.
- Эргына чынжымак «шӧртньӧ кидан» улеш, - ойла Алексей нерген аваже. – Тудо изинек техника дене кылым кучен кушкын, шке кидше дене мини-тракторым поген.
Алексей армийышке 2020 ий июньышто каен. Хабаровский крайышке, мотострелковый войскашке логалын. Воинский долгым сайын шуктымыжлан тудлан младший сержант званийым пуымо.
Вашке Алексей шочмо кундемышкыже пєртылшаш, кызыт родо-шочшыжо-влак дене кылым тудо серыш да телефон гоч куча.
Венера АГЛЯМОВА.