Наградым пашаж дене сулен налын

Наградым пашаж дене сулен налын

2021 ий 4 мартыште, Тўнямбалсе ўдырамаш кече вашеш, К. Давлеткильдеева лўмеш республиканский гимназий-интернатыште БР-се образований да наука министр Айбулат Хижин 2019-2020 тунемме ийыште Тунемше-влак кокласе всероссийский олимпиадын призержо-влакым ямдылыше туныктышо-влакым саламлен.

Нуным чылаштымат Башкортостан Республик вуйлатышын премийже дене палемдыме.

Пашаштышт сай могырчын ойыртемалтше-влак коклашке Я. Ялкайн лўмеш марий гимназийыште физкультурым туныктышо Лариса Николаевна Мурзашеват логалын. Тудын тунемшыже – Данила Иркабаев 2019-2020 тунемме ийыште Физический культура дене тунемше-влак кокласе всероссийский олимпиадын призержо лийын.

Айбулат Хажин туныктышо-влакым икымше шошо пайрем – тўнямбалсе ўдырамаш кече дене саламлен, пеҥгыде тазалыкым, суапым, пиалым да ончыкыжым эшеат кугурак сеҥымашыш шуаш тыланен. А Тунемше-влак кокласе всероссийский олимпиадылан тунемше-влакым сайын ямдылымыштлан тау мутым ойлен.

Тылеч вара А. Хажин ойыртемалтше - всероссийский да межрегиональный олимпиада-влакын, моло конкурс ден мероприятийлаште сеҥыше ден призер-влакым ямдылыше туныктышо-влаклан Башкортостан Республик вуйлатышын премийжым пуымо нерген дипломым кучыктен.

Башкортостан Республик вуйлатышын пунчалже почеш премий тунемше-влак кокласе всероссийский олимпиадын 29 призержылан, перечневый олимпиадыште 105 сеҥышылан, перечневый олимпиада ден конкурслаште призёр-влак радамыш логалше 290 тунемшылан пуымо. Премий тыгак Тунемше-влак кокласе всероссийский олимпиадын призержо-влакым ямдылыше 27 педагоглан да перечневый олимпиадылаште сеҥыше ден призёр-влакым ямдылыше 226 туныктышылан пуалтын.

Фирдаус КАДИКОВА ямдылен.