«Мастар-влак ола»

«Мастар-влак ола»

Мероприятийышке сельский поселений вуйлатыше-влак, Мишкан район МР Совет председатель В. Сабиров да Совет секретарь Т. Коледина миеныт. Поро марий йўла почеш, уна-влакым кинде-шинчал да шокшо мелна дене вашлийме.

Пайрем годым верысе уста мастар-влакын пашаштым Пўнчер ялысе школын спорт залыштыже вераҥдыме. Кажне мастарын пашаже моткоч чапле да оҥай лийын, нуным чыланат кӧранен онченыт.

«Мастар-влак олан» ик устаже, Наталья Баймурзина, шўртӧ дене «сўретла» - марий тувыр-влакым сылнын тўрла. Но тўрлышаш тўрым ончылгоч ок палемде, «сўрет-влак» пашам ыштымыж годым шочыт. Творческий айдеме чыла пашалан уста маныт, Наталья Баймурзина нерген лач тыге каласаш лиеш.

Виолетта Игнатьева шке пашаштыже уста мастер улеш. Тудо ургызо – швея. Родо-шочшыжо, йолташыже, палымыже-влаклан мотор деч мотор тувыр-влакым урга. Тудо иканаште дизайнер, раскройщик, ургызо да манекенщица улеш. Пандемий жапыште Виолетта ял калыклан медицинский маске-влакым урген, тыге ятыр еҥын тазалыкшым арален коден.

Валентина Кумушаева уже 25 ий портышкемым йӧра. Тиде пашам тудын ачажат, аважат ыштеныт. Ты жапыште тудо мыняр портышкемым ыштымым каласаш неле – шкат ок шарне. Пимаже-влак шокшо веле огыл, тыгак моткоч мотор улыт. Нуным чиет гын, нимогай йўштыштӧ от кылме. Уста ўдырамаш пытартыш жапыште самырык-влаклан модный портышкем-влакым ышташ ямдылалтеш.

Азалия Калиева изинек сўретлаш йӧратен. 2017 ийыште тудо БГУ-н Пўрӧ оласе филиалжын педагогика факультетышкыже тўҥалтыш образований да изобразительный искусство профиль почеш тунемаш пурен. 2018 ийыште «Тынаре мўндыр да лишыл эртыше» диптих дене Уфа оласе округ советын премийже лауреат лийын.

Валентина Янгуатовалан усталыкым Юмо пӧлеклен, манаш лиеш. Тудо Пўнчер ялыште бисер да шўртӧ дене пидме шотышто эн сай кидпашазе улеш. Валентина пашаже-влакым сылнештараш тўрлӧ арверым кучылтеш. Тыге мотор деч мотор герданым, жгут-шырчам, жгут-кидшерым, такия-согам да молым ышта. Валентина декоративно-прикладной искусство дене районысо да регионысо конкурс ден викторина-влакын призерышт улеш.

Марина Иванова ялыште ик эн уста ургызо да тўрлызӧ. Тудо мотор деч мотор марий тувыр-влакым урга да тўрла. Уста ўдырамаш тыглай марла тувыр-влакым ургымо дене ок серлаге, тудо тыгак верысе «Юго» куштышо калык ансамбльлан да «Вўд толкын» фольклор ансамбльлан мотор вургем-влакым ямдыла.

Вячеслав Айбашев Пўнчер ялыште илыше моло еҥ семынак вольыкым онча. Озанлыкыштыже тудо кум ушкалым, ўшкыжым да тўрлӧ ютым ашна. Шке ыштыме шӧр продукцийжым тўрлӧ вере ужала. Свежа шєрым, озанлыкыштыже ямдылыме ўмбалым, тувыртышым, ўйым ялысе да оласе калык кумылын налыт.

Артем Айбердин мўкшым онча. Мўкш ончымо пашалан тудо ачаж дечын тунемын да изинек тиде пашам умбакыже шуяш кумылаҥын. Мўй ден мўй продукцийжым утларакшым Уфа олаште – тўрлӧ ярмиҥгалаште ужала.

Алексей Иванов уста баянист, хореограф, «Юго» куштышо калык ансамбль да «Вўд толкын» фольклор ансамбль вуйлатыше улеш. Яра жапыштыже тудо йондалым тодеш. Фольклор калык ансамбль шочмеке, тудлан изиж годым кочаже туныктымо пашам шарналташ пернен. Кызыт тудо тыгай йолчиемым концерт номер-влаклан ямдыла. Вет ожсо йўла ден кидпашам аралыман да нуным шукташ да ышташ самырык ден йоча-влакым, икшыве ден уныка-влакым туныктыман. Кызыт ачаже ыштыме пашалан изирак эргыже тунемеш.

Ольга Зайнакаева моткоч оҥай да уста ўдырамаш – тудо тўрлє арверым кагаз лызе гыч ышта. Тыгак спица да крючок дене пидеш. Но эн йӧратыме пашаже – кагаз лызе гыч тодмаш. Тудын кидыштыже тошто газет ден журнал-влак мотор арверыш савырнат. Выставкыште тудын ыштыме тўрлӧ комдо, терке, ате, арча-влак верланеныт.

Пайрем мероприятийым шкеныштын выступленийышт дене «Юго» куштышо калык ансамбль ден «Вўд толкын» фольк- лор ансамбль сӧрастареныт.

Венера АГЛЯМОВА.