«2021 ийысе эн сай туныктышо»

«2021 ийысе эн сай туныктышо»

Идалык еда педагогический мастарлык конкурсым эртарымаш поро йўлашке савырнен. Тений тиде конкурс молыгунамсе деч ойыртемалтше лийын манына гынат, огына йоҥыло, очыни. Мутат уке, конкурсым районысо калык образований отдел эртара.

Но тений тиде мероприятийым марий историй да тўвыра рўдер шке шулдыр йымакыже налын. Тидыжым конкурсым эртарыме вержак пеҥгыдемда. Икмыняр кече ончыч гына тошто «Мир» кинотеатрым капитально уэмдыме деч вара марий историй да культура рўдер торжественно почылто.

Ончычсо кинозалым тачысе жаплан келыштарен, зал-трансформерым ыштыме. Сцена кугу. Сандене тыгай мероприятий-влакым эртараш эн келшыше вер.

Районный конкурсын финалышкыже куд туныктышо лектын. Теве нунын лўмышт: Изи Накаряк кыдалаш школын Арзамат ялысе филиалжын тўҥалтыш класслаште туныктышо Регина Александрова (педагогический стажше куд ий, икымше категориян туныктышо), Ф. Буляков лўмеш 1 №-ан лицейыште руш йылмым да литературым туныктышо Миляуша

Аллаярова (педагогический стаж 8 ий, кўкшӧ категориян туныктышо), Ф. Буляков лўмеш 1 №-ан лицейыште тўҥалтыш класслаште туныктышо Гульназ Ахмадуллина (педагогический стаж 10 ий, кўкшӧ категориян туныктышо), Кемий кыдалаш школын Янагуш ялысе Г. Загитов лўмеш филиалжын математикым туныктышыжо Файруза Исламова (педагогический стаж 31 ий, кўкшӧ категориян туныктышо), Ардаш кыдалаш школышто тўҥалтыш класслаште туныктышо Лиана Камалиева (педагогический стаж 7 ий, икымше категориян туныктышо), Чорай ялысе Я. Ялкайн лўмеш марий гимназийыште тўҥалтыш

класслаште туныктышо Римма Николкина (педагогический стаж 31 ий, кўкшє категориян туныктышо).

Конкурсын икымше заданийже - «Визитный карточка». Конкурсант-влак тиде конкурсышто шкешт нерген палдареныт. Тидлан чылаже вич минут жапым ойырымо. Чыла выступлений оҥай лийын. Шотлышо комиссийын иктешлымашыже почеш, тышке эссем возымо заочный конкурсышто налме очко ушалтын, Г. Ахмадуллина, Л. Камалиева, Р. Александрова сеҥышыш лектыныт.

Мастер-классым ончыктымо конкурсышто кажныже шке мастарлыкшым тўрыс почын пуаш тыршен. Тидлан чылаже лу минут веле пуалтын. Сандене южо туныктышыжо шке моштымашыжым ты жапыште тўрыс ончыктен шуктен огыл.

Конкурсын пытартыш заданийыштыже вучыдымын лекше педагогический ситуаций гыч лекме йӧным мумаш аклалтын. Кажне конкурсант ты йӧным муын моштен.

Жюри каҥашыме жапыште изи концерт ончыкталтын. Варажым конкурсант-влакым педагогический пашан ветеранже Х. Гайфуллин, образований пашаеҥ-влак профсоюз райком председательын заместительже О. Сергеева саламленыт.

Конкурс пытен. Кӧ вара 2021 ийыште районышто эн сай туныктышо лўмым налеш да районын чапшым республика кўкшытыштӧ аралаш тўҥалеш? Чылан тидым шўм-вургыж вученыт.

Теве кужын вучымо тат. Сценышке образований отдел вуйлатыше С. Александров лектын… «Шинчымашым аралыше»

(«Хранитель знаний») номинацийыште математикым туныктышо Ф. Исламова палемдалтын. «Руш йылмым да литературым эн сайын туныктышо» номинацийыште, мутат уке, М. Аллаярова сеҥышыш лектын. Вет участник-влак коклаште ты предметым туныктышо-влак гыч тудо шкетын веле лийын. «Шўмемым йочалан пуэм» номинацийыште Р. Николкина ойыртемалтын.

Тўҥалтыш класслаште туныктышо-влак кум призовой верым налыныт. «Педагогический ўшан» номинацийыште сеҥыше Л. Камалиева кумшо лийын. «Шке почеш вўдаш» номинацийыште сеҥыше Г. Ахмадуллина кокымшо верым налын. Икымше верым судья-влак ик йўк дене Р. Александровалан пуэныт. Регина Фаниловна «Самырык туныктышо» номинацийыште палемдалтын.

Ынде тудлан районын чапшым республик кўкшытыштӧ аралаш логалеш. Ме тудлан сайын выступатлаш да районын чапшым эн ончыко лукташ тыланена.

Светлана ТОЙМУРЗИНА.