Шочмо йылме – калыкын чонжо

Шочмо йылме – калыкын чонжо

Шочмо йылме – тиде тыглай мут огыл. Шочмо йылмым палыше еҥ кӧргӧ чоныштыжо шочмо калыкын культурыжым арала да тўням вес шинча дене ужын мошта.

Тўнямбалне йылме мыняре шукырак, айдеме тукым тунаре поянрак улеш. Вет кажне йылме, кажне мут айдеме тукымын историйже да культурыжо нерген посна информацийым арала.

Башкортостан Республик тўрлӧ калык илыме республик улеш. Тидлан кӧра Башкирийыште калык-влак коклаште ваш келшен илаш кумылаҥдыме пашалан кугу вер ойыралтеш. Тыгак тўрлӧ калыклан шкеныштын йылмыштым, культурыштым, йўлаштым аралаш йӧн ышталтеш.

Шочмо йылмым аралымаш паша – марий калыкым обслуживатлыше секторын ик эн тўҥ пашаже. Тидлан кӧра БР-се мари этнический группым обслуживатлыме шотышто секторын библиотекарьже-влак О. Зайнитдинова ден И. Айбердина 2 №-ан Мишкан кыдалаш школышто 7-ше класслаште тунемше-влак коклаште «Шочмо йылме – калыкын чонжо» поэзий шагатым эртареныт.

Вўдышӧ-влак ондак пайремын историйже дене палдареныт, тиде кечын кўлешан улмыжым умылтареныт. Тылеч вара марий поэт В. Колумбын, татар поэт Г. Тукайын, пошкырт поэт Р. Гариповын шочмо йылме нерген почеламутышт, руш поэт-влак В. Шефнерын «Есть слова – словно раны, слова – словно суд», В. Брюсовын «Мой верный друг! Мой враг коварный!» почеламутышт йоҥгалтыныт.

Варажым «Шочмо йылме – калыкын чонжо» видеообзор ончыкталтын. Мероприятий мучаште библиотекарь-влак Башкирийыште илыше калык-влак нерген книга-влак дене палдареныт. Тушто тыгай книга-влак лийыныт: «Народы Башкортостана» историко-этнографический очерк, «Мы дружбой сильны» информационно-справочный изданий, «Марийцы» историко-этнографический изданий, «Коренные народы России. Башкиры» научный изданий, В. Колумбын ойпогыжо да моло.

Чеверласыме деч ончыч библиотекарь-влак йоча-влаклан «Марий йылме» буклет-влакым шалатеныт.

И. АЙБЕРДИНА, БР-се мари этнический группым обслуживатлыме шотышто секторын тўҥ библиографше.