Шочмо йылме!

Шочмо йылме!

Шочмо йылме моткоч уста туныктышо. Йылме-калыкын тўҥ энертышыже, тудын чонжо, кумылжо, уш-акылже. Мемнан йылмына – мўндыр кугезына-влакын пуэн кодымо пӧлекышт, сандене ме тудым ача-авана семынак эреак йӧратен аралышаш улына. Кажне айдемын шке шочмо йылмыже уло. Кӧн дыр тиде руш, башкир, татар, чуваш да тулеч моло йылме. Мемнан - марий йылме!

Кажныжлан шке йылмыже шўмжылан лишылрак да эн мотор чучеш. Шочмо йылмыжым айдеме изи годсо пагыт годымак, кунам тудо икымше шомак-влакым каласа, тунемаш тўҥалеш. А кажне айдемын икымше шомакше-влак «авай», «ачай» улыт. Кӧ дыр тиде мут-влакым вес тўрлын каласа, но значенийже икте кодеш. Шочмо йылме дене каласыме шомак кеч-кӧланат ныжылгын, моторын, ямлын йоҥгалтеш.

Марий йылме! Моткоч пагалем шочмо йылмемым. Могай тудо поян, вий-куатан. Кузе сылнын шоктат марий мут, почеламут, муро-влак! Кызытсе курымышто самырык тукым йылмым арален кодымо нерген шагалрак шона. Шукынжо рушла мутланат. Калыкыште ойлат: «Йылме ила - калык ила». Мыйын шонымаште, кажне еҥ шочмо йылмыжым палышаш, пагалышаш, тунемшаш да мутланышаш. Кажне айдеме шке шочмо йылмыжым йӧрата, эре шке йылмыже дене кутыраш шона. Ожнысек айдеме-влак шке йочашт-влакым изинекак шочмо йылмыштлан туныктат. Ончыкыжат тиде ныжылге, яндар вўд семын йогышо марла йылмына ончылно эре лийже. Йылме ынже пыте манын, йоча-влакым изинек шке шочмо йылмыштлан туныкташ кўлеш, кудыж дене аваж ден ачаже кутырат да умбакыже шке шочмо йылмым вияҥден шогыман.

Шочмо йылме кече вашеш чыландамат тиде пайрем ден саламлем! Йӧратыза шке шочмо йылмыдам да пагалыза!

Шочмо йылме - эре ончылно лийшаш.

Мый йӧратем шочмо йылмем.

Шочмо йылме, кугешнем тый денет!

С. МИКИШЕВА, Уфа оласе Марий рушарня школын методистше, туныктышыжо.