Все новости
Тӱрлӧ
20 Пургыж , 14:20

Афганец-влак таҥасеныт

14 февральыште Афган сарыште кредалше-влакым Бурай район шокшын вашлийын

Афганец-влак таҥасеныт
Афган сарын ветеранже-влак коклаште военно-спортивный зональный конкурс Афган Республик гыч совет войска-влакым лукмылан 31 ий теммылан лўмлалтын.
Тиде сарыште ятыр совет салтак шкенжын долгшым ўшанлын шуктен, нуно воин-интернационалист лўмын чапшым изишат волтен огытыл.
Сар лўйкален чарныме дене ок пыте. Тудын нерген шарнымаш салтак-влакын чоныштышт кужу жап ила, пылышыштлан
снаряд-влак пудешталтме йўк солна, чўчкыдын пырля служитлыме йолташышт-влак кончат. 9 ий жапыште совет армий
Афганистаныште 15 тўжем утла салтакым йомдарен, эше 35 тўжем салтак нелын сусырген але инвалид лийын кодын, 300 еҥ увер деч посна йомын. Башкирий гыч тиде сарыште тўжем утла еҥ кредалын, нунын кокла гыч 300 наре еҥже вуйжым пыштен.
Бурай селаште боевой действийын ветеранже-влак коклаште таҥасымаш калыкым таза илышым илаш, спорт дене кылым кучаш тараташ, самырык-влакым патриот шўлышеш кушташ виктаралтын.
Тений таҥасымаште 8 команда вийжым терген. Команда-влак тыгай районла гыч лийыныт: Киги, Аскын, Мишкан, Балтач, Татышле, Бурай, Караидель, Дуван.
Вашлиймаш шокшо точкылаште служитлыше-влаклан шогалтыме памятник воктеке пеледышым пыштыме да митинг дене тўҥалын, тыгак памятник воктене тўшка фотографийым ыштыме.
Таҥасымаш деч ончыч ветеран-влакым Бурай район МР администраций вуйлатыше Рушан Кадимович Гареев саламлен да выступленийыштыже афган сарын участникше-влакын самырык-влаклан сай пример улмыштым палемден.
Салам шомак деч вара таҥасымаш тўҥалын. Тушто боевой действийын ветеранже-влаклан вийыштым, чолгалыкыштым, туран лўйкален моштымыштым да писе улмыштым ончыкташ кўлын. Ондак команда-влак визитный карточкыштым ончыктеныт. Варажым пневматический винтовка дене лўйкаленыт, топым комдыш кышкеныт, АК-74 автоматым рончен погеныт, дартс дене модыныт да пикш дене лўйкаленыт. Таҥасымаш пеш шокшо лийын, сеҥымаш верч чыланат талын кучедалыныт.
Мишкан районын командышкыже Венер Фатхинуров, Гадиф Бикбулатов, Данил Илинбаев, Юрий Адылбаев, Виталий Имакаев, Василий Бикбаев пуреныт. Делегацийым самырык-влак дене паша шотышто тўҥ специалист, «Самырык Гвардийын» верысе отделенийжым вуйлатыше Ольга Биктубаева вуйлатен.
Ольга Биктубаева ден Венер Фатхинуров Нефтекамск оласе «Боевое братство» всероссийский общественный организацийын Башкортостанысе отделенийжын правлений членже-влаклан «Закаленные Афганистаном» книгам кучыктеныт.
Мероприятий пайрем банкет дене мучашлалтын. Афганец-влакым районысо Культура пӧртын артистше-влак саламленыт да сылне концерт номер-влакым ончыктеныт. Тушто афганец-влак шкат артист койышыштым ончыктеныт – сар жапысе муро-влакым муреныт да службыштым шарналтеныт.
О. БИКТУБАЕВА.