Келшымаш
-26 °С
Пылан
Все новости
Тӱрлӧ
12 Пургыж 2021, 13:31

Ямле сем кумылым савырен

5 февральыште Пўрӧ олаште марий дискотека эртен

Ямле сем кумылым савырен
Январьыште ме, марием Матвей Байназов дене пырля, февральыште Пўрӧ олаште марий дискотека эртыме нерген увертарымашым ужна да виклан тушко каяш кумылаҥна.
5 февраль марте жап писын эртыш, вучымо кече толын шуо. Каныш кече-влак марте ме погынышо пашам пытараш тыршена. Эше шуматкечын суткалан ЦРБ-шке дежурствыш каяш кўлын. Тидлан кєра кугарнян пашам чулымынрак ышташ
пернен, но ыштышашым чыла ыштен шуктымо.
Каслан дискотекыш каенна. «Аврора» холлышкыжо калык утыр погынен. Гардеробышто вургемнам писын сакеныт да виклан калык шуко лийшаш нерген палдареныт.
Чыла верат пеледышан мотор марий тувыр-влакым чийыше ўдырамаш-влак койыныт. Йырым-ваш «Сай улыда!», «Поро кас!» шомак-влак шоктеныт. Мемнан дене палыдыме еҥ-влакат саламлалтыныт. Билетым налмеке, ме Сергей Байназовым вашлийна, тудым шокшын ӧндална да залыш пурышна. Тушто мемнам администратор вашлийын да бронироватлыме верышкына – барный стойка деке корным ончыктен. Икмыняр тат гыч мыланна ўстелым погымо. Лимон ден чайым да мороженыйым заказатлымеке, ме калык погынымым эскераш тўҥална. Мо ӧрыктарен: пайремышке мемнан ийготаш мужыр-влак – пенсионер-влак шукын погыненыт.
Ик жап гыч самырык-влакат толыныт, нуно чолгалыкышт дене палынак ойыртемалтыныт. Пайрем тўҥалтыште ныжыл семым чўктымє. Жапын-жапын мемнан деке толын палымына-влак саламлалтыныт, южышт тора гыч кидым гына рўзалтеныт. Икманаш, чыланат ик кугу ешла лийыныт, иквере тынар марий погынымалан кумылышт нєлтмє шижылтын.
Ик жап гыч вўдышӧ кӧ кушеч улмым йодышташ тўҥалын. Калык тўрлӧ вер гыч погынен улмаш: Благовещенск ола гыч, Мишкан район гыч, Пўрӧ районысо ялла гыч... Палыме лийме деч вара ямле тальянка сем йоҥгалтын, мурызо-влак мураш
тўҥалыныт, погынышо-влак нунылан мураш полшеныт. Кокымшо мурылан шукын кушташ лектыныт. Тыге ямле марий дискотека тўҥалын. Эн чулымын, конешне, калык «тывырдыкым» куштен. Тиде куштымаш марийын гына огыл кумылжым
савыра да ончыкыжымат савыраш тўҥалеш. Тиде куштымаш эркынрак тўҥалеш да утыр чулымештеш. Куштышылан веле огыл, ончышо-влакланат чолгалыкым пуа.
«Тывырдык» уло марий калыкым ушен шогышо, кугезына-влак дене кылым кучаш полшышо куштымаш. Тиде куштымаш калыкын рўдыжӧ улеш манына гынат, йоҥылыш она лий. Арам огыл куштымаш уло чоным савыра да марий калык верч
кугешнаш, чолга да чулым лияш, марий йўла верч вуйын шогаш тарата.
Сергей Байназов, тудын ешыже, ансамбльже марий йылме ден йўлам вияҥдыме верч кугун тыршат. Марий концерт ден дискотека-влак самырык-влакым шочмо йылмым, культурым йӧраташ да пагалаш кумылаҥдат. А йылме ден культурым
пагалыше еҥ калык йўламат пагала. Суапле пашашке самырык мурызо-влак Алексей Байназов, Анастасия Миксонова, Лариса Шагиева ушненыт.
Мероприятий тўҥалтыште тыгай йодыш йоҥгалтын: «Тиде вашлиймашым молан лўмдаш?». Пырля каҥашымеке, пайремым марий тувырлан лўмлымӧ. Вет «кандырам пунымаш» - «тывырдык» куштымаш калыкын чонжо гын, марий тувыр
марийын сынже.
Л. ХАКОВА.