Самырык профессионал-влак

Самырык профессионал-влак

Колледж ден техникумышто тунемше студент-влак коклаште профессиональный мастарлык конкурсым эртарымаш республикыште поро йўлашке савырнен. Идалыклан икана региональный конкурслаште сеҥыше-влак «Самырык профессионал-влак» национальный финалыште участвоватлат. Сеҥыше-влак гыч элнан сборный командыже тўнямбал чемпионатыште участвоватлаш чумыралтеш.

2020 ий 14 гыч 19 декабрь марте Башкортостан Республикыште «Самырык профессионал-влак» VI региональный чемпионат эртен. Тиде чемпионатыште 94 компетенций дене таҥасеныт. Региональный чемпионатыште 884 конкурсант ден 704 эксперт-компатриот, юниор-влак шотышто 180 тўҥ эксперт ден заместительже-влак, 139 технический

администратор участвоватленыт.

Мишкан агропромышленный колледжын студентше-влак мемнан тунемме заведенийын чапшым региональный этапыште

араленыт: 2-шо курсышто тунемше Вадим Валеев - «Кермычым оптымаш» компетенцийыште, 1 курсышто тунемше Вадим Муртазин - «Мўкшызӧ» компетенцийыште. Мут толмаште, ты номинацийыште ме икымше гана участвоватленна. Участник-влак да нунын наставникышт - производственный туныктымашын мастерже-влак Г. П. Искаков, К. Д. Кутлуметов, туныктышо-влак К. Ю. Михайлова, П. Т. Петров ты конкурслан чот ямдылалтыныт.

Региональный таҥасымаш республикысе тўрлӧ колледжлаште, тыгак компетенций-влакын тўнямбал специализированный рўдерлаште - Уфа оласе архитектура, чоҥымо паша да коммунальный озанлык колледжыште («Кермычым оптымаш») да Мелеуз оласе шуко профильян профессиональный колледжыште («Мўкшызӧ») эртеныт. Тўҥ эксперт да нунын заместительышт-влак реальный жап режим дене таҥасымаш кузе эртымым эскереныт да регламентым шуктымым пеҥгыде контрольышто кученыт.

«Кермычым оптымаш» компетенцийын участникше-влак инструкцийым налыныт, заданий-влакын эскизышт дене палыме лийыныт да кузе аклаш тўҥалмым рашемденыт. Конкурсный заданий икмыняр модуль гыч шоген. Кажныжым почела ыштыман лийын. Кажне модуль посна аклалтын. Конкурсышто кермыч гыч пырдыжым оптымо, декоративный кладка да кермыч-влак кокласе ушем-влакым тўрлӧ семын ыштымаш аклалтыныт.

«Мўкшызӧ» компетенцийыште тыгай критерий-влак лийыныт: мўкш еш пыжашым иземдымаш, шоя мўйым палымаш, мўкш

омарташке пыжаш да магазин рамке-влакым шындымаш, мўкш чер-влаклан диагностикым ыштымаш, пыжашым кугемдымаш, кокымшо корпусым шындымаш.

Та‰асымашын итогшо почеш мемнан студентна-влак кўкшє баллым налыныт да призовой верлашке лектыныт: Вадим Валеев - 2 вер, Вадим Муртазин - 1 вер. Ынде нуно мемнан республикын чапшым Национальный чемпионатыште аралаш тўҥалыт. Тудо 2021 ийыште Уфаште эрташ тўҥалеш.

Ме студентна-влакым тыгай кугу сеҥымаш дене шокшын саламлена да республикын чапшым сайын аралаш тыланена.

М. ГАЙСИНА.