Землякна-влак тыге служитлат

Максим Шаркаевым армийыш кеҥежым, 20 июньышто ужатеныт. Тудо посна противотанковый артиллерийский дивизийыш логалын. Механик-водитель улеш.

Максим Мишканыште шочын, 1 №-ан лицйыште тунемын. Техникым пургедаш йӧратен, картингист-влак кружокыш коштын. 9 класс деч вара Мишкан агропромышленный колледжыш «Механизация сельского хозяйства» специальность дене тунемаш пурен. 19 июньышто тудлан дипломым кучыктеныт. Эрлашыжымак рвезе шочмо элым аралаш каен.

Службым Смоленск областьыште эрта.

Шукерте огыл салтакын ача-аважлан служитлыме частьын командованийже Тауштыме серышым колтен. Тушто возымо: «Пагалыме Анатолий Леонидович ден Ольга Леонидовна! Войсковой частьын командованийже увертара, тендан эргыда Шаркаев Максим Анатольевич шкенжым чолган «артиллерист» манын каласен кертеш.

Службым эртыме жапыште Максимым икана веле огыл командований сай могырым палемден.

Максим шке службыжо, пашаж дене йолташыже-влакым кумылаҥден шога, тудо командир-влакын ўшанле полышкалышыже улеш….

Тыгай эргым ончен-куштымыланда кугу таум каласена!»

Меат шкенан землякна дене кугешнена.

Венера АГЛЯМОВА.