«Мыйын икымше паспортем»

«Мыйын икымше паспортем»

12 декабрьыште мемнан элна кугу пайремым - Россий Федераций Конституций кечым палемден. Лач тудо мемнан илышна могай лийшашым палемда - илышлан, канышлан, илыме верлан, медицина полышлан, профессийым ойырен налаш правам пуа.

Лач тиде пайрем вашеш 14 ийым темыше-влаклан Россий Федерацийын тўҥ документшым - паспортым торжественно кучыктымаш поро йўлашке пурен. Тений тыгай пиал районышто тунемше 9 йочалан шыргыжын.

Рвезе-влакым саламлаш район администраций вуйлатыше П. Трапезников, район Советын секретарьже Т. Коледина, Россий МВД-н Мишкан районысо отделын миграций отделенийжын специалист-экспертше С. Мурзабаева, образований отделын воспитатлыме паша шотышто методистше Л. Акбулдина, ача-ава-влак да, мутат уке, самырык-влакын икымше полышкалышышт, самырык-влакын пашашт шотышто отделын специалистше О. Биктубаева миеныт.

- Тачысе кече гыч те шке элдан тичмаш праван гражданинже улыда. Те тудлан эре кўлешан улмыдам шарныза, тудын законжо-влакым да шке обязанностьдам шуктыза, - каласен шке саламлымаштыже муниципалитет вуйлатыше Павел Владимирович.

Саламлыме шомакыш Советын секретарьже Татьяна Коледина ушнен.

Шкеныштын икымше документыштым рвезе-влак район администраций вуйлатышын кидше гыч налыныт. Нунылан тыгак шарнымаш пєлек да буклет-инструкций кучыкталтын.

Пытартышлан чылан пырля шогалын, шарнымаш фотом ыштеныт.

Венера АГЛЯМОВА.