«Ме пырля!» акций эрта

Пандемий мемнан здравоохраненийын лушкыдырак улмыжым рашемден. Коронавирусный инфекций дене кучедалаш уло вий дене пижынна гынат, черым эше чактарен она керт.

Эн неле паша, конешне, медицина пашаеҥ-влакын вачўмбакышт возын. Нуно кажне кечын шучко чер дене кучедалыт, тидын годым чўчкыдын шкат черланат. Тидлан кӧра нунылан общественный организаций, депутат-влак корпус «Ме пырля!» всероссийский вашполыш акций, «Единый Россий» партийын депутатше деч полыш» программа кышкарыште полшаш тыршат – больница ден госпитальлашке медик-влаклан вич тонн наре продуктым намийыме. Полыш Пўрӧ оласе зональный ковидный госпитальыш, Дӧртыльӧ оласе специализированный госпитальыш да Уфа оласе госпитальлашке толын. Мишкан ЦРБ-се инфекционный да терапевтический отделений-влакат ӧрдыжеш кодын огытыл. Верысе медик-влаклан гуманитарный полышым БР-се Кугыжаныш Погын – Курултайын депутатше Я. Кугубаев ден Мишкан район МР Советын 12 №-ан округ деч депутатше В. Сабиров конденыт.

Продуктовый набор-влакым медик-влаклан районысо тўҥ врач И. Абзалтдиновын кабинетыштыже кучыктымо. Медицина пашаеҥ-влак полышым алал кумылын налыныт, свежа пакчасаска ден емыж нунын тазалыкыштым палын пеҥгыдемдаш полшышаш улыт.

Депутат-влак шке могырчынышт медик-влаклан пандемий дене лўдде кучедалмыштлан тау мутым ойленыт да сеҥымашыш

шуаш тыланеныт.

Вениамин КОНДОГИН.