«Еш - эн шерге пыжаш…»

«Еш - эн шерге пыжаш…»

«Однажды двадцать лет спустя» кинофильмыште школым тунем пытарыме деч вара коло ий гыч выпускник-влак вашлиймашке погынат. Кажныже илышыште могай сеҥымашке шумо нерген йолташыштлан кугешненрак ойлат. Ик еҥже

айманенрак гына вашешта: «Мый - ава улам». Совет пагытысе ты киносо эпизод шуко икшыван ава Екатерина Каниева дене мутланыме годым ушыш пурыш. «Еш кажне еҥлан эн шерге улеш, поснак йоча-влаклан. Вет тудо чын айдеме лийын кушкаш полша даӱмыр мучкылан пеҥгыде эҥертыш лиеш», - мутланымашым Екатерина Даниловна тыгай шомак дене тӱҥале.

Екатерина Каниева шуко икшыван ешыште кушкын. Тудо кумшо йоча лийын. Йылышыште илыше Зинаида Ипулаевна ден Данил Байрамовичын Катя деч вара эше кок йочашт шочын.

- Ача-авана мемнам йӧратен куштеныт, - ойла Екатерина. - Лач келшен илыше кугу еш мыйым личность семын шуарымаште кугу рольым модын.

Катя изи улмыж годымак шкенжынат вес гана шуко икшывыже лиеш, манын ӱшанен илен. Ончыкылык пелашыже Аркадий дене келшаш тӱҥалмеке, тудо изи годсо шонымашыж дене йолташыжым палдарен. Самырык рвезылан келшыме ӱдыржын

ойжо келшен, йоча - тукымым шуйышо гына огыл, а кугу пиал, манын вашештен.

Самырык-влакын шонымашышт шукталтын. Тиде пиалан мужыр кум ўдырым да кум эргым ош тӱнялан пӧлекленыт. Аделиналан 16 ий, тудо Мишкан агропромышленный колледжыште тунемеш. Ожно ача-аважат туштак тунемыныт, тунам ты тунемме заведений 150-ше ПУ манылтын.

Савелийлан 9 ий, тудо нылымше классыште тунемеш. Матвей - 8 ияш, кокымшо классыште шинчымашым пога. Вич ияш Илья ден кум ияш Селена йоча садыш коштыт. Эн изи Дарина ик ият шым тылзаш гына.

Шуко икшыван еш 2007 ийыште чоҥымо пӧртыштӧ ила.

- Пӧртсийым пайремлыме годым мемнан Аделина ӱдырна лийын. Тиде пӧртыштӧ варажым вич йоча шочын. Чын, кызыт

изиш шыгыррак. Ончыкыжым у, кугу пєртым чоҥаш план уло. Мыланна, шуко икшыван еш семын, пӧртым чоҥаш мланде участкым пуэныт.

Еш вуй Арсений Алексеевич сезонкышто пашам ышта. Кызыт тудо суртышто улеш. Сандене пелашыже пеш йывыртен, сурт сомылым шкетын ышташ ок верешт.

Кунам марийже кум тылзе дене пашаште лиеш, чыла шке ышташ перна, изи-влакым ончаш Аделина полша.

- Кызыт кум тылзе дене пашам ыштем, тидыже сай. Ончыч пел ий дене сезонкышто лийме годым изи-влак мыйым мондаш тӱҥалыт ыле, - манеш шуко икшыван ача.

… Шуко икшыван ешыште куанжат шукырак. Ача-авалан йокрокланаш жап уке. Еш вуй Арсений Алексеевич ешлан оксам ситараш тырша. Суртозавате Екатерина Даниловналан шке озанлыкыште сомыл нигунам ок пыте. Шуко икшыван ача-ава лияш - пеш кугу паша. Нуно умылат, икшыве-влак лач суртышто сай ден удам ойыркалаш, мом ышташ лийме да мом ок лийым палаш тунемыт.

Светлана ТОЙМУРЗИНА.