Келшымаш
-10 °С
Пылан
Все новости
Тӱрлӧ
28 Шыжа 2020, 12:47

Витле ий ваш келшен илат

Мишкан селаште илыше Янгубаевмытым шӧртньӧ сӱанышт дене саламлыме

Витле ий ваш келшен илат
Вате ден марийым саламлаш Мишкан район МР администраций вуйлатышын кадр да социальный йодыш-влак шотышто заместительже Л. Александрова миен. Торжественный обстановкышто тудо Яныбай Янгубаевич ден Ольга Изиляевналан пеледыш аршашым да Башкортостан Республик вуйлатыше деч пӧлекым – мотор чай сервизым кучыктен да салам серышым лудын.
- Тендан шӧртньӧ сӱанда ваш пагален, йєратен, келшен, пашам ыштен, пырля тӱрлӧ нелылыкым сеҥен илымашын символжо. Те шкаланда да икшывыланда пиалым пєлеклыше пеҥгыде ешым чоҥен кертында, - возалтын Р. Хабиров лӱм дене возымо салам серышыште.
Лариса Геннадиевна Яныбай Янгубаевич ден Ольга Изиляевнам Мишкан район МР администраций вуйлатыше П. Трапезников лӱм денат саламлен, нунылан волгыдо пиалым, суапым да ончыкыжымат ваш келшен илымашым тыланен.
- Мемнан районышто еш-влак ожсек пеҥгыдылыкышт дене ойыртемалтыт. Вет еш тӱрлӧ тукымым ушен шогышо вий улеш, тушто калыкын йӱлаже, историйже, йылмыже аралалтыт. Еш айдемылан йєратымашым, пагалымашым, ўшаным пєлекла да кеч-могай жапыштат пеҥгыде эҥертыш улеш, - возымо Петр Владимировичын салам серышыштыже.
Янгубаевмыт чынжымак ваш келшен да икте-весыштым пагален илат. Нунын дене мутланен кумыл нӧлтеш. Кузе палыме лийда манын йодмемлан, тичмаш вашмутым пуыч. Самырык жапыштыже Ольга Ташпаева (Ольга Изиляевнан ўдыр фамилийже) Мишкан РДК пеленсе ансамбльыште куштен. Ты жапыште Мишканыш практикыш 21 ияш студент – Стерлитамак оласе культпросвет училищыште тунемше Яныбай Янгубаев толын. 20 ияш Ольга тудын кумылжым савырен.
Рвезат ўдырлан келшен. Ик ий гыч, 1970 ийыште, нуно мужыраҥыныт – ямле сӱаным ыштеныт. Еш вуй шешкым Ирсай гыч Коракыш чолга имньым кычкыме да моторын сӧрастарыме тарантайка дене наҥгайымыжым алал кумылын шарналта. Яныбай Янгубаевичын ачаже сӱаным шӱвыр сем дене эртараш йодын. Тудо ту жапыште черле лийын, сандене эргыже
ачажын чыла ойжым шотыш налын да тичмаш шуктен. Сӱанышт чыла марий йӱлам шуктен ышталтын.
Самырык-влакым мужыраҥмышт дене саламлымеке да суапым пуымеке, сӱанышт деч вара нылымше кечыште ачашт ош тӱням коден каен. Ойго ешыште кажне еҥын чонжым авалтен. Но Яныбайын чонжым икте луштен – ачаже самырык-влакын мужыраҥмыштым ужын да суапым пуэн коден шуктен.
Еш пыжашым самырык-влак Мишкан селаште чоҥаш кумылаҥыныт. Тыштак кок ӱдырым ончен куштеныт, сай образованийым налаш полшеныт. Юля ӱдырышт Мишкан селасе 1 №-ан лицейыште тӱҥалтыш класслаште туныкта,
Алёна Мишкан районысо поликлиникыште прививочный медсестра улеш.
Ольга Изиляевна ӱмыржӧ мучко почтышто пашам ыштен. Тудо Башкортостан связьын ветеранже улеш. Яныбай Янгубаев РФ да БР культурын сулло пашаеҥже улеш, кужу жап «Эрвел» куштышо калык ансамбльым вуйлатен. Тудын тыршымыж дене тиде коллектив республикыштына веле огыл, пӱтынь Российыште да моло эллаштат палыме лийын. Мишкан районысо артист-влаклан совым Российысе тӱрлӧ олалаште кыреныт. 1997 ий кеҥежым «Эрвел» ансамбль гастроль дене Италийыш миен – тиде элысе тӱрлӧ сценыште марий культура дене палдарен. Тиде Яныбай Янгубаевын паша лектышыже. Тудо 2007 ийыште пенсийыш лектын гынат, ансамбльым эше кок ий вуйлатен.
Ансамбльыште Яныбай Янгубаевичын кок ӱдыржат куштеныт. Туштак, ачаж ден аваже семын, Алёна ӱдырышт ончыкылык пелашыжым – Алексей Биктубаевым вашлийын. Алексей ден Алёна пеҥгыде да шуко икшыван ешым чоҥеныт. Нунынат икшывышт уло кумылын куштат да кочашт ден куаваштым марла куштымаш-влак дене куандарат.
Янгубаевмытын эн кугу уныкашт, Анастасия, финансово-экономический колледжыште икымше курсышто тунемеш. Екатерина, Надежда да Михаил школышко коштыт. Нуно Яныбай Янгубаевич ден Ольга Изиляевнам куандарен шогат.
Вашлиймашлан ямдылалтмем годым мый юбиляр-влак дечын еш пиалыштын секретышт нерген йодышым пуаш ямдылалтынам ыле, но йодышым пуаш ала-молан шым тошт. Нунын дене мутланен, шкалам тыгай иктешлымашым ыштышым: нунын нимогай секретышт уке.
Пиалым шкеныштын тыршымышт дене чоҥеныт. Илышыштышт иктаж нелылык, текшырымаш лектын гынат, ондак чыла акленыт, шотыш налыныт, вара веле мом дыр ыштеныт. Ольга Изиляевна мунло ўдырамаш улеш. Иктаж-могай єпке
лектеш гын, виклан каласаш тырша, єпкем чон кӧргыштӧ кужу жап кучымашым удалан шотла.Вате ден марийым тыгак озанлыкышт ушен шога – нуно ютым, вольыкым ашнат. Ончыч кок ушкалышт лийын, кызыт – ӱшкыж ден пашмакышт уло. Суртозавате сурт кӧргысӧ сомылым нигунамат шкет веле ыштен огыл, вет пиалан ешым чыла пашамат пырля ыштен гына
чоҥаш лиеш.
Светлана ТОЙМУРЗИНА.