Келшымаш
-18 °С
Пылан
Все новости
Тӱрлӧ
26 Шыжа 2020, 15:11

Выпускник-влак 50 ий эртымеке вашлийыныт

Коронавирусный инфекций шарлымаш лушкыдемме жапыште Чорай кыдалаш школын 1970 ийысе выпускникше-влак шочмо школыштышт погыненыт

Выпускник-влак 50 ий эртымеке вашлийыныт
Вашлиймеке, чыланат икте-весыштым ужмылан куаненыт, коклан икте-весыштым виклан паленат огытыл. Вет южо еҥже пырля тунемме йолташыже-влакым витле ий ужын огыл.
Школышто мемнам алал кумылын Элина Апканиева (Идулбаева) вашлийын. Мый тудым йоча жапше гычак палем. Тудо ончычсо семынак мотор да порын шыргыжалын мутланышан улеш, шочмо школна нерген чыла сайын пала.
А школнан историйже моткоч поян. Выпускникше-влак тудым элнан тўрлє кундемлаштыже чапландарат. Нунын коклаште ончыл колхозник, пашаеҥ, профессор, наука доктор, калык писатель, калык артист, тўрлӧ отрасльлаште сулло пашаеҥ, офицер-влак улыт. Генерал йотке уло.
Вашлиймашна оҥайын да ямлын эртен. Ондак перекличкым эртаренна да уна-влакым регистрироватленна. Вашлиймашке пырля тунемме йолташна-влак чыланат, манаш лиеш, толаш шоненыт, но шучко чер кумдан шарлымылан кӧра южо йолташна суртыштыжо кодын. Шочмо школыштына эн чолга-влак погыненыт манына гынат, очыни, йоҥылыш она лий.
Чаманаш кодеш, икмыняр йолташна ош тўня дене уже чеверласен. Ме нуным шып уштышна.
1970 ий деч вара тиде ийысе выпускник-влак кум гана погыненыт: 1985, 1995, 2005 ийлаште. Тиде вашлиймаш нылымше лийын. Пырля погынымеке, ондак шкенан икымше туныктышынам шарналтышна. А нуно шукын улыт улмаш, вет Чорай школышко йоча-влак 45 ял гыч тунемаш коштыныт, Бурай да Пўрӧ районла гычат толыныт. Мыйын икымше туныктышем мулло да тыматле койышан ўдырамаш Ольга Дмитриевна Ерусланова ыле, мый тудым нигунам ом мондо.
Мыланна кугу куаным шкенан туныктышына-влак дене вашлиймаш конден - вашлиймашке биологий ден трудым туныктышо Любовь Андрияновна Ахмедьянова ден математикым туныктышо Дигитай Юрьевич Юзукбаев толыныт. Нуно туныктымо предметыштым пеш сайын паленыт, кажне йочалан чыла умылтараш тыршат ыле, тидын годымак пеҥгыдын йодшан ыльыч. Тачысе кечылан нуно коктынат чолга да чулым, яндар уш-акылан улыт, мемнам чыланнамат, манаш лиеш, виклан паленыт. Мемнан тунемме жапыште школ директор пашам Андрей Шамшиевич Шамшиев, Валерьян Дмитриевич Кадеев шуктеныт. Класснам Римма Андреевна Мурманская, Пайгуза Валеевич Валеев вуйлатеныт. Нунылан да моло туныктышына-влаклан мемнан верч вийышт ден жапыштым чаманыдымылан чон гыч лекше тау мутым ойлена.
Чаманаш кодеш, шукын мемнан коклаште уже укелыт. Ме шкеат, чыланат манаш лиеш, пенсийыште улына. Сулен налме канышыш лекмешкыже Виталий Иркабаев Ленин лўмеш колхозышто пашам ыштен, ончыл механизатор лийын. Пелашыже – ончыл доярка Галина дене пырля вич икшывым ончен куштеныт. Кызытат ончычсо семынак чыным да пашам йєратыше улыт.
Виталий Кутиев кужу жап Тымбай кыдалаш школышто завхоз лийын пашам ыштен. Мый тудын дене роно методкабинетыште пашам ыштымем годымак палыме лийынам. Тудо моткоч йомартле да чулым еҥ улеш. Тидын годым каласыме мутшым пеҥгыдын куча да шке пашажым эре кўлеш семын ышта. Орина ватыж дене коктын кум эргым ончен куштеныт. Кызыт коча ден кувавам куд уныка куандара.
Вениамин Янсубаев Кульчубай гыч улеш. Икымше категориян геолог, Уфа оласе УБР-ыште, Нижневартовск олаште ЗСЭГБ-ште, Башнефтьыште пашам ыштен. Маргарита пелашыж дене коктын кок эргым, ик ўдырым ончен куштеныт. Эрге-влак ачаштын корныж дене каеныт да нефтяник лийыныт. Ӱдырышт фармацевт-провизор лийын ышта. Янсубаевмыт Пўрє олаште илат. Вениамин кеҥеж еда шочмо ялышкыже толеш. Тудо тальянкым устан шокта, кас мучко мемнам сылне сем дене куандарен.
Виталий Минилишев поро пошкудына улеш. Тудо райпошто водитель лийын ыштен. Тєргымдўр ялыште шочын-кушкын, кызыт Мишканыште ила. Пелашыж дене коктын вич эргым ончен куштеныт. Икшывышт-влак ача-ава деке чўчкыдын толыт. Шукерте огыл суртыштышт ремонтым ышташ полшеныт.
Павел Николаев Эшым ялыште шочын-кушкын. Кызыт Изи Накаряк ялыште ила. Жапыштыже Дуван ял озанлык техникумышто агрономлан тунем лектын. Агроном, Рефанде совхозын Арзамат отделений управляющий, лесник лийын ыштен. Тудо тўрлӧ пашаште пеҥгыдын шуаралтын, вуйлатыме пашаштат кугу опытым поген. Школышто тунемме веле огыл, техникумышто тунемме йолташыже-влак денат пеҥгыде кылым куча.
Геннадий Антонов Тӧлдӧ ял гыч улеш. Нефтяной институтым тунем пытарымеке, нефтехимический заводышто инженер лийын ыштен. Тиде алал кумылан еҥ шочмо вер-шєржє дене кылым йомдарен огыл, ялыштыже чапле пєртым чоҥен, идалыкын утларак ужашыжым лач тушто ила. Г. Антонов мыланем книгамым лукташ полшен, тидлан тудлан чон гыч лекше тау мутым ойлымо шуэш.
Станислав Кадеев Чорай ялын шочшыжо улеш. Директорын эргыже ыле гынат, тидын дене нигунам моктанен, пайдаланен да шкенжым кугуеш ужын огыл. Кызытат тугаяк проста, поро чонан еҥ улеш. Ме тудын Ирина пелашыжымат сай могырчын гына палена. Кадеевмыт Нефтекамск олаште илат, яра жапыштышт мўкшым ончат. Станислав кужу жап Башсельмаш заводышто инженер лийын ыштен, варажым йўдвел кундемыш пашаш коштын.
Аркадий Байрамоват Чорай гыч улеш. 30 ий утла Сургут олаште нейрохирург лийын ыштен. Кызыт Пўрӧ олаште ила. Но шочмо ялже денат кылым кўрлын огыл – Чорайыште ача-аваже илыме олмышто сай пӧртым чоҥен. Кок ўдыржє ача корно дене каен – хирург лийыныт, эргыже нефтяник улеш. Аркадийын шым уныкаже уло. Тудын Надежда пелашыже Марий Элысе Курык марий район гыч улеш, школышто математикым туныктен. Кажне вашлиймашке нуно коктын толыт.
Лидия Байбулатова (Ахметьянова) Чорай ялыште шочын-кушкын. Ӱмыржє мучко счетный пашаеҥ лийын ыштен, пенсийыш лекмыж деч ончыч Мишкан районысо ял озанлык управленийын тўҥ экономистше лийын. Тўҥалтыш класслаште тунеммына годымак Ольга Дмитриевна Лидан арифметикым тунемаш усталыкшым рашемден да счетовод лиеш манын каласен. Туныктышына ончык ужын улмаш, Лида бухгалтер лийын. Саша пелашыжат мемнан пырля тунемме йолташна ыле, ош тўням пеш эр кудалтен кайымыжлан чаманаш гына кодеш.
Ирина Васина (Александрова) Маевка ял гыч улеш. Тудо школышто тунеммына годым чолга спортсменка ыле – ече дене пеш писын куржталын. Кызыт пелашыж дене коктын Нефтекамск олаште илат. Ирина пеш шуко мурым, такмакым пала да сылнын мура. Нуно Надежда дене коктын пайремнам палын сєрастарышт.
Лена Янситован (Белоусован) ачаж ден аваже Андреевка ял гыч ыльыч. Но икшывышт-влак Чорайыште шочын-кушкыныт. Ленам школ воктеке пелашыже кондыш. Машина гыч лекмекыже мый тудым виклан пален нальым. Но моло йолташна-влак кужу жап пален ышт керт. Лена тугаяк мотор, тыматле койышан кодын. У Тынбай ялыште продавец лийын ышта.
Иван Ялаев шуко икшыван ешыште Тӧлдӧ ялыште шочын-кушкын. Коло ий Мишкан РОНО-што самырык техник станций директор лийын ыштен. Кызыт «Путник» рўдерыште картинг кружокым вўда. Техникым, шкенжын воспитанникше, уныкаже-влакым йӧрата.
Рита Камиланова (Ялаева) тиде выпуск дене 8 класс марте тунемын, варажым техникумыш тунемаш пурен. Пўрымаш мыйым Иван дене кылден. Тидлан кӧра мый тиде выпускын ныл вашлиймаштыжат лийынам да Иванын пырля тунемме кажне йолташыжым сайын палем. Шкеже ятыр жап тунык- тышо лийын ыштенам, роношто методкабинетым, районысо Культура отделым вуйлатенам. Кажне вашлиймаш деч вара «Келшымаш» да «Чолман» газетлашке изирак статьям возаш тыршем, серышемым книгашкем ешарем.
Теве тыгеракын эртыш мемнан вашлиймашна. Тудым эртараш йєным ыштымыштлан организатор Вениамин Янсубаевлан да полышкалышыже Аркадий Байрамовлан чон гыч лекше тау мутым ойлымо шуэш. Нуно пырля тунемме йолташышт-влакын адресыштым, телефон номерыштым кычалын муыныт, вашлийме жапым рашемденыт. Тиде кечым кок гана кусараш пернен. Туге гынат, вашлиймаш эртен да мыланна кугу куаным конден.
Тыгак «Сайвер» кафе оза Людмила Минилбаевалан ойлымо шуэш. Нуно кафештым вашлиймаш вашеш моторын сєрастареныт, тамле кочкышым ямдыленыт, алал кумылын обслуживатленыт.
Мучашлан пырля тунемме йолташем-влаклан уэш вашлиймеш манме шуэш.
P.S. Шукерте огыл илыш дене мемнан пырля тунемме эше ик йолташна – Олег Николаев чеверласен. Тудын Маша пелашыжлан, Ирина да Надя ўдыржӧ, уло родо-шочшыжо-влаклан пырля тунемме йолташыже-влак лўм дене кугу чаманымашым каласем да ойгыштым лош пайлем.
Рита ЯЛАЕВА.