Меҥай кокай

Меҥай кокай

С. С. Салиев ден М. К. Андре- ева кеҥежым 90 ийым темышт. Таче мый Меҥай акай нерген возынем. Тудын ачаже Мандиев Каликай, аваже Алиева Мадина. Тиде ешыште, Пекшек ялыште, 1930 ий 10 августышто Меҥай акай шочын. Тудо аважын ойлымыж почеш, шке шочмыжым тыгерак шарна.

…Аваже мӱшкыран лийын гынат, пашам ыштен. Ту кечынат эрдене эрок тӱредаш каен, пасушто ӱдыр азам ыштен, ончылакеш пўтыралын да мӧҥгӧ конден. Азам пукшен, шкеже изишак пурлын, каналтен да уэш тӱредаш каен…

Меҥай ешыште визымше икшыве лийын: Елена, Элыкпай, Миклай, Салима, Шымай. 1937 ийыште ача деч посна кодыныт. Авалан куд икшывым ончаш йӧсӧ лийын гынат, чылаштым йол ӱмбак шогалташ тыр- шен. Елена акаже, Миклай, Шымай рвезынек илыш дене чеверласеныт. Элыкпай изаже сарыш каен, тушеч пӧртылын огыл. Меҥай ден Салима акаже коктын веле кодыныт. «Мый Салима акайым пеш йӧратем ыле, эре почешыже коштынам. Тудо поктен колта, а мый адак шыман гына почешыже мием ыле», - шарналта Меҥай акай.

Коктынат Нерге ялыш марлан лектыныт. Салима - Захаров Антонлан, Меҥай - Андреев Изыланлан. Кум йолташ - Изылан, С. Нуриев, С. Сайниев 1944 ийыште сарыш каеныт. 1951 ийыште кумытынат таза-эсен пєртылыныт.

Изылан Меҥай акайым марлан налын, но Нергыште нуно шагал иленыт. Меҥайын аваже ялыште шкет кодын, сандене нуно Пекшекыш кусненыт. Ту пагытыште илыш неле лийын. Изылан связистлан пашам ыштен. Меҥайын аваже 67 ияш колен.

Меҥай ден Изылан ныл икшывым ончен-куштеныт. Икшывышт-влак мужыраҥыныт, илышыште кажныже шке вержым муын. Коча ден кувавам индеш уныка куандарен, но…

Меҥай акайлан шуко ойгым ужаш пернен. Пелашыже, Тамара, Венера, Гена икшывыже-влак коленыт. Ава шкет кодын, Аркадий эргыже тудым шкеж дек илаш конден. Кызыт 90 ияш Меҥай акай Аркадий эргыже да Галя шешкыж дене ила. Нунылан вий шутымо семын сомылым ышташ полша. Шкеже моткоч чулым улеш, сайын мутлана, ожсо илышым чыла шарна. Уш-акылже яндар. Акайын йӧратыме сомылжо - каза-влакым ончымаш. Олыкыш волта, шудым кӱрын пукша. Казашт-влак каслан шуко шӧрым пуат. Нуно Меҥай акай почеш огыт код. Акай кушко - каза тушко. Южгунам огеш лекат, капка ончылно вучен шогат. Кызыт Меҥай акайым 9 уныкаже, 16 кугезе уныкаже куандарат. Ме тудым эртыше шочмо кечыж дене саламлена, тазалыкым, кужу ӱмырым тыланена.

М. ГАРЕЕВА, Нерге ял, тӱҥалтыш ветеран организацийын председательже.