Ӱлыл Шогертен ялыште Кугу Отечественный сарыште кредалше-влак лӱмеш памятникым почмо

Тиде пашалан ял калык кужу жап ямдылалтын. Обелискым, конешне, кўчык жапыштат ышташ лиеш, но Кугу Отечественный сарын участникше-влакым чылаштымат рашемдыме паша жапым йодеш. Вет кеч ик еҥ спискыш пурталтыде кодеш гынат, паша мучаш марте шукталтме ок лий.

Сандене ондак сарын участникше-влакым рашемдыме, варажым спонсор-влакым кычалме, оксам погымо, материалым налме. Чыла тидым ыштымеке, чоҥаш тӱҥалме да ик жап гыч чоҥен пытарыме. Мемориалым почаш чапым Мишкан район МР администраций вуйлатышын кадр да социальный йодыш-влак шотышто заместительже Л. Г. Александровалан, Ирсай сельсовет СП администраций вуйлатыше С. В. Хазиевлан да инициативный группын еҥже А. С. Килинбаевалан пуымо.

...Теве ал тасмам пӱчмӧ, тудын ужашыжым посна талиҥгашке пыштыме. Ончыкыжым нине арвер-влак посна аралалташ да Ӱлыл Шогертен гыч тулан сарыш кредалаш кайыше, тушто вуйыштым пыштыше да сеҥымаш дене пӧртылшӧ-влакым ушештараш тӱҥалыт.

Памятникым почмеке, ял калыкым тиде кугу событий дене Мишкан район МР администраций вуйлатышын кадр да социальный йодыш-влак шотышто заместительже Л. Г. Александрова, Ирсай сельсовет СП администраций вуйлатыше С. В. Хазиев, районысо ветеран-влак советын председательже Ю. Г. Балахнина, «Эрвел марий» калык культура автономий председатель В. Т. Байбулатов саламленыт. Варажым моло кумылан-влак выступатленыт. Пеш шокшо шомакым пашан ветеранже Н. Адрашева ойлен, сарыште тудын куд родо-шочшыжо кредалын, но чыланжак пєртылын огытыл...

Салам шомак-влак деч вара тып минутым увертарыме. Шочмо элнам аралыше-влакым шып шоген уштымеке, обелиск ончыко пеледыш аршашым пыштыме. Памятник почмашке толшо-влак обелиск воктеке шкеныштын икшывыштым, уныкаштым намиеныт да кугезыштын лўмыштым ончыктеныт.

Варажым памятникым ыштымаште ойыртемалтше-влакым палемдыме. Тиде кечын тауштыме серышым Снежана Лекандровна ден Эдуард Байдуганович Байгазовмытлан, Юлия Валерьевна ден Игорь Михайлович Килинбаевмытлан, Алена Семеновна ден Эдуард Михайлович Килинбаевмытлан, Людмила Петровна ден Рудольф Байрамович Саляевмытлан, Людмила Александровна ден Виктор Васильевич Шагиевмытлан да молылан кучыктымо.

Палемдымаш деч вара калыклан оҥай концертым ончыктымо. Ончышо-влакым шкеныштын выступленийышт дене РДК-н пашаеҥже-влак В. Кутлуметов, М. Салимов, И. Аликаева, С. Салиев куандареныт. Мероприятий памятник ончылно пырля возалтмаш дене мучашлалтын. Ты жаплан уна-влакым обелиск деч тораште огыл шокшо чай да тӱрлӧ тутло кочкыш дене ӱстел-влак вученыт.

Мучашлан каласен кодаш кӱлеш: Кугу Отечественный сарын участникше-влакын лўмыштым рашемдаш Алена Килинбаеван 90 ияш кочаже полшен. Тидлан тудлан чон гыч лекше тау мутым ойлена!

В. КОНДОГИН.