Пенсионер-влак чолга улыт

Пенсионер-влак чолга улыт

Мероприятийыш 30 утла еҥ толын. Тыште почеламутым возышо-влак гына огыл, тыгак поэзийым йӧратыше-влак, «Мишкан сем» ден «МуроЭм» ансамбль-влакын участникышт лийыныт.

Касым вӱдышӧ, историй да культура рӱдерым вуйлатыше А. Ибулаев кӱчыкын пайрем историйже дене палдарыш. Тӱнямбал поэзий кечым 1999 ий гыч ЮНЕСКО-н лукмо пунчалже дене палемдаш тӱҥалыныт.

- Таче тышке Мишканыште илыше-влак гына огыл, а тора ялла гычат поэзийым йӧратыше-влак толыныт, - каласен шке выступленийыштыже ветеран-влак совет председатель Ю. Балахнина. - Чорай гыч туныктымо пашан ветеранже Л. Русиева, Козаш гыч Д. Яметов толыныт…

Эн ончычак мутым тӱҥалше поэт, район дене ик таҥаш улшо М. Шипаевлан пуымо. Тудо ожно роношто инспекторлан ыштымыж годым «Дружба» газетын ик чолга авторжо лийын. Рабселькор-влакын VI республиканский съездыштыже лийын. А почеламутым 89 ияш улмыж годым веле возен. «Мишкан мы- йын шӱмыштем» почеламутшо 11 январьыште лекше «Келшымаш» газетыште савыкталтын. Автор ты вашлиймаште лач тиде почеламутшым лудын, ожсо жапшым изишак шарналтен.

Районышто С. Салиевам палыдыме еҥже укеат, очыни. Тудо почеламутым воза, семжымат шкеак келыштара. Ныл почеламутшым лудын пуыш да «Мишкан сем» ансамбль тудын возымо «Пиалан жап йоҥген муро гае» мурыжым йоҥгалтарен, баяным Н.Бабичев шоктен.

Л. Русиевамат районышто сайын палат. Тудын «Сонарпыл кӱвар» книгаже Йошкар-Олаште савыкталтын. «Мишкан - мыйын шулдыр» книгам савыктен лукмаште кугу надырым пыштен. Чорай школышто туныктышылан ыштымыж годым шуко еҥым поэзий деке шӱмаҥден. Таче тудын пашажым А. Юзукбаева умбакыже сайын шуя. Икманаш, Чорай велыште уста-влак шукын улыт.

Нерге ял гыч М. Гареева почеламутым шке ок возо, но тудо калык муро-влакым пога. Кок книгам савыктен луктын, икымшыштыже 450 утла такмакым чумырен, кокымшыштыжо 900 утла такмак погынен. Кумшо книгалан ситыше погымем уло манеш шкеже.

Нерге гычак Д. Александрован «Шочмо-кушмо ялем» почеламутшо чылалан келшен.

Поэзий пайремыште шке возымышт дене Мишкан гыч Г. Баширова, Кемий гыч Т. Изибаева, Мишкан гыч Н. Ямурзина, Козаш гыч Д. Яметов выступатленыт.

Мучашлан увертарен кодымо шуэш, 19 майыште Марий Эл Писатель ушем Мишканыште Йыван Кырлан шочмыжлан 110 ий темме да В. Абукаев-Эмгакын шочмыжлан 60 ий темме лўмеш «Кырла ден Эмгак лудмашым» эртара.

Валерий АБУКАЕВ.