Келшымаш
+1 °С
Пылан
Все новости
Образований
1 Шыжа , 14:41

Туныктышо-влак тукым гыч

БР образованийын отличникше Альберт Ибулаев йоча-влакым уже 45 ий туныкта

Туныктышо-влак тукым гыч

Альберт Яковлевич 1956 ий 22 майыште Караидель районысо Шопкер ялыште шочын. Ачаж ден аваже ўмырышт мучко Шопкер кандашияш школышто ыштеныт. Ачаже биологийым туныктен да школ директор лийын. Аваже марий йылмым туынктен. Нуно Ибулаевмыт туныктышо-влак тукымлан негызым пыштеныт – шым икшывышт гыч кудытшо туныктымаш пашам ойырен налын. Тиде тукымын чумыр педагогический стажше – 615 ий.
Альберт Ибулаев 1963-1971 ийлаште Шопкер ялысе школышто тунемын. Рвезылан утларак биологий, химий, географий келшеныт. Урок-влак деч вара спорт дене кылым кучен, фотографий-влакым ышташ тунемын. Тыгак «Самырык натуралист» кружокыш коштын. Тушто тунемше-влак кайык да янлык чучел-влакым ышташ тунемыныт.
1971 ийыште А. Ибулаев Благовещенск оласе педагогический училищыш марий отделенийыш тунемаш пурен да 1975 ий марте тунемын. Тушто духовой оркестрыште тенор дене шоктен, куштымаш кружокыш коштын. Ту жапыште педучилищын духовой оркестрже кумдан палыме лийын да оласе чыла мероприятийлаштат шоктен. Тиде опыт рвезылан ончыкыжым моткоч кўлешан лийын.
Училищым тунем пытарымеке, рвезым Ӱлыл Шогертен ялысе тўҥалтыш школышко пашаш колтеныт. Пашаже РОНО вуйлатыше А. А. Александров дене мутланымаш гыч тўҥалын. 1976 ий майыште рвезе Совет Армийыш служитлаш каен. Стратегический назачениян ракетный войскаште служитлен (РВСН), аппаратура да АСУ ракетный комплекс специалист – аппаратный начальник лийын. Демобилизаций деч вара 1978 гыч 1980 ий марте Караидель районысо Шопкер ялысе школышто ыштен. Интернатыште воспитатель да тўҥалтыш класслаште туныктышо лийын. 1980 ий гыч Пўрємучаш ялысе кандашияш школышто (кызыт Изи Накаряк ялысе школын филиалже) ышташ тўҥалын. 1981-1986 ийлаште Башкирский педагогический институтышто естественно-географический факультетыште заочно тунемын да географийым туныктышо специальностьым налын.
Альберт Яковлевич тиде школышто кызытсе кече марте ышта. 45 ий жапыште тудо кужемдыме кече группын воспитательжат, ятыр классын класс вуйлатышышт лийын. Пионер пашамат шукташыже пернен. 20 ий укерак директорын воспитатлыме паша шотышто заместительже лийын, тыгак класс вуйлатыше-влак методический ушемым вуйлатен. Икмыняр ий краеведческий кружокым вўден. «Отечествын корныж дене» туристско-краеведческий движенийын республиканский краеведческий конференцийжын участникше лийын. Тудын тунемшыже – Юлия Ибулаева «Анатолий Бикын илыш-корныжо» шымлымаш пашаж дене кум ий почела республикыштына призовой вер-влакым налын.
Географий дене районный олимпиадылаштат тудын тунемшыже-влак ик гана огыл призовой вер-влакым налыныт.
Йоча-влакым туныктымаште А. Ибулаев компьютерный технологийым моштен кучылтеш. Тыге урок-влак оҥайынрак эртат да тунемше-влакын ушешышт кужу жаплан кодыт.
Тўҥ паша деч посна туныктышылан мер пашамат шукташ пернен. Совет жапыште тудо агитатор лийын, полевой станлаште, ушкал фермылаште «Молния» выпуск-влакым луктын, Рефанде совхоз пашаеҥ-влаклан ончыкташ йоча-влак дене концерт номер-влакым ямдылен.
Пашаште изи огыл сеҥымашыш шумыжлан Альберт Яковлевич образований отделын да район администрацийын чап грамотышт дене палемдалтын. Туныктышо БР образованийын отличникше лўмым сулен налын.
Пелашыже – математикым туныктышо Нина Яныбаевна дене пырля кок ўдырым ончен куштеныт. Нунат туныктышо лийыныт. Жапыштыже Пўрє оласе государственный социально-педагогический академийыште тунемыныт, кызыт коктынат Нижневартовск олаште илат, дошкольный учрежденийлаште воспитатель лийын ыштат.
Школышто кужу жап пашам тыршен ыштымыжлан кӧра Альберт Яковлевич коллегыже да тунемше-влак коклаште веле огыл, ял калык коклаштат кугу пагалымашым сулен налын.
Материалым Мишкан районысо образований отдел пуэн.

Туныктышо-влак тукым гыч
Автор:Фирдаус Кадикова